Գնահատանքի Հաւաք Ի Պատիւ Թեքուանտոյի Քննութիւններուն Փայլուն Արդիւնք Արձանագրած Մարզիկներուն

Յարաբերաբար  ընդունելի պայմաններէն  քաջալերուելով,  Լիբանանի  Թեքուանտոյի  ֆետերասիոնը, 26 Սեպտեմբեր եւ 3  Հոկտեմբերին   երկու   քննութիւններ կազմակերպեց  Մոն  Լա Սալի մէջ:

 Առաջինը՝  կարմիր գօտի  կրող, « առաջին տան, փում» եւ « երրորդ տան, փում» քննութիւնները, որուն  ՀԵԸ Անդրանիկ Անթիլիաս մասնակցեցաւ  27  մարզիկներով: Մեր մարզիկները  փայլուն արդիւնքներ արձանագրեցին քննութիւններուն: 26   մարզիկներ ստացան  սեւ  գօտիի կարգ, իսկ մէկ  մարզիկ «  երրորդ տան, փում»:   

 Երկրորդը՝    չորս   եւ  «հինգ  տան, փում» կարգի  քննութիւն մըն էր,  որուն  ՀԵԸ Անդրանիկ Անթիլիաս  մասնակցեցաւ  վեց մարզիկներով:  Հինգը ստացան «չորրորդ  տան, Մեսթըր»ի կոչում, իսկ մէկը՝ 5-րդ «տան»:

 Ի պատիւ այս    փայլուն արդիւնքները արձանագրող մարզիկներուն, ՀԲԸՄ-ի Տեմիրճեան կեդրոնի տնօրէնութիւնը, Շաբաթ,  31  հոկտեմբեր, 2020-ի երեկոյեան, գնահատանքի  հաւաք մը կազմակերպեց, կեդրոնին  5-րդ յարկին  մէջ: 

Հաւաքին  ներկայ  գտնուեցան ՀԲԸՄ-  ՀԵԸ-ի Կեդրոնական Վարչութեան  ատենապետ Վիգէն Չերչեանը,  ՀԲԸՄ-ՀԵԸ Անդրանիկ Անթիլիասի Գործադիրի ներկայացուցիչ  Թալին Ինքնատիոսեանը, «Կրենտ-Մեսթըր»  Պասըմ  Աատ, մարզիկներուն ծնողները  եւ  սեւ գօտի կրող բոլոր  մարզիկները:

 Գնահատանքի խօսք արտասանեց   ՀԲԸՄ-ՀԵԸ-ի Կեդրոնական Վարչութեան ատենապետ Վիգէն Չերչեանը, շնորհաւորելով  Թեքուանտոյի դպրոցին  նոր յաջողութիւնները: Ան  նաեւ շնորհաւորեց ՀԵԸ-ական  Գարոլ Չալեանը,  Լիբանանի Թեքուանտոյի  ֆետերասիոնին մաս կազմելու առիթով:  Մարզիկներուն  սրտի խօսք յայտնեց   «Կրենտ -Մեսթըր» Պասըմ Աատը: 

 ՀԲԸՄ-ի Տեմիրճեան  կեդրոնի անունով   իր  բարեմաղթութիւնները յայտնեց  Յասմիկ Աւետիքեանը:  Ապա  մարզիկները մարզիչներէն ստացան  իրենց սեւ գօտիները:

Բարեմաղթութիւններէն  ետք հատուեցաւ  օրուան կարկանդակը:  

 ՀԵԸ-Ի ՄԱՄԼՈՅ   ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ