Ն․Ս․Օ․Տ․Տ․ Գարեգին Երկրորդ
Ծայրագոյն Պատրիարք Եւ Ամենայն Հայոց Կաթողիկոսի
Ուղերձը Ժողովրդին
Սիրելի հաւատաւոր զաւակներ,
Արցախեան հակամարտութեան հանգուցալուծման առնչութեամբ վերջին ժամերին մեր հայրենիքում տեղ գտնող զարգացումները, կայացուած որոշումները փոթորկել են ամէնքիս հոգին։ Մեր հայեացքի առջեւ են անցնող աւելի քան երեք տասնամեակներին յանուն Արցախի անկախութեան պայքարած ու տքնած, իրենց կեանքն ընծայած մեր հայորդիները, վերջին 44 օրերի ընթացքում նահատակութեամբ իրենց կեանքը փառաւորած սիրելիները, պատերազմի տառապանքը յաղթահարող մեր քաջարի արցախահայութիւնը, այս պահին առաջնագծում անյողդողդ կանգնած ամէն մի զինուորն ու հրամանատարը։ Ծանր բաժին է ընկել մեզ բոլորիս, բայց նաեւ պատասխանատուութիւն՝ ի շահ հայրենիքի գործելու սթափ քաջութեամբ, հեռատես իմաստութեամբ եւ անսակարկ վճռականութեամբ։
Աղօթք է մեր սրտում յանուն համազգային մեր խոհեմութեան եւ միասնականութեան։ Դարաւոր մեր պատմութեան դասերի քաջ գիտակցութեամբ եւ ազգային միաբանութեան պահպանման անհրաժեշտութեամբ կոչ ենք անում պահպանել հանդարտութիւնը եւ չտրուել մեզ փոթորկող զգացումների անհարկի դրսեւորումներին, զերծ մնալ բռնութիւններից եւ անկարգութիւններից։ Առկայ ճգնաժամը պէտք է իր կարգաւորումը ստանայ Հայաստանի եւ Արցախի ռազմաքաղաքական ուժերի միասնական ջանքերով։ Սիրելիներ, մեր պահուածքը երբեք չպէտք է վտանգի առաջնագծում խրամատների մէջ իրենց սրբազան ծառայութիւնը քաջութեամբ շարունակող զինուորների կեանքը։ Թիկունքը այս իրավիճակում առաւել քան երբեւէ պէտք է ամուր մնայ, թիկունքում պիտի հաստատուն լինի համերաշխութիւնն ու կայունութիւնը, որպէսզի կարողանանք միասնաբար լուծումներ ու ելքեր գտնել յանուն Արցախի ու Հայաստանի, յանուն մեր ժողովրդի անվտանգ եւ ապահով կեանքի։
Կոչ ենք ուղղում նաեւ Հայաստանի եւ Արցախի իշխանութիւններին անյապաղ հիմնաւոր եւ սպառիչ բացատրութիւններ ներկայացնելու մեր ժողովրդին ի հայրենիս, յարցախ եւ ի սփիւռս՝ կայացուած որոշումների եւ հայրենի մեր երկրի ապագայի վրայ դրանց ներազդեցութեան վերաբերեալ։
Մենք խոնարհւում ենք մեր հայրենեաց պաշտպանների յաղթական ոգու առջեւ եւ բարձրօրէն գնահատում ենք ազգիս իւրաքանչիւր զաւակի անձնուիրումն ու զոհողութիւնը: Մենք հաւատում ենք մեր ժողովրդի իմաստութեանը։
Աստուած պահապան մեզ եւ մեր հայրենիքին։
