Ֆէյսպուքի ընկերներէս Դ. Դաւթեանի մէկ գրառումը ինծի յիշեցուց ԵրԱԶ մեքենային պարագան:
Երեւանի մէջ ժամանակին կը գործէր ինքնաշարժներու արտադրութեան գործարան մը, որ կ’արտադրէր միջին չափի մարդատար-ապրանքատար մեքենաներ, ծանօթ` գործարանի ԵրԱԶ (Երեւանի ավտո զավոդ) անունով: Հերթով, ատեն ատեն երկար ժամանակ սպասելէն ետք երբ մարդիկ ձեռք կը բերէին իրենց ԵրԱԶը (անշուշտ չմոռնալով մաղարիչին` “շնորհակալագինին” մասին), մեքենան ուղիղ կը քշէին արհեստանոց…նորոգութեան:
Շաբաթներ շարունակ կ’աշխատէին տակով վրայով, ներսով ու դուրսով տեսքի եւ պիտանելիութեան բերելու համար ինքնաշարժը, որովհետեւ գործարանէն նոր դուրս եկած մեքենային մէջ ամէն ինչ թափած կ’ըլլար` “մարմինը” ամրացնող պտուտակներէն սկսեալ մինչեւ շարժիչի եւ մնացած մեխանիզմներուն մասերը: Եղած է պարագայ նոյնիսկ, որ ԵրԱԶը գործարանէն դուրս բերեն մէկ այլ ինքնաշարժի կապած վիճակով… Ի վերջոյ, աշխատասէր սեփականատէրներու շնորհիւ, մեքենան կը դառնար քիչ թէ շատ դիտարժան, պիտանի եւ կանխատեսելի, որով կը փոխադրէին մարդիկ կամ ապրանքներ, ըստ ինքնաշարժի տիրոջ սեփական design-ին եւ ցանկութեան: Սակայն բնականաբար կային նուազ բծախնդիրները. անոնց նուազ սարքին ԵրԱԶները յաճախ պատճառ կը դառնային վթարներու եւ ողբերգութիւններու, խլելով մարդկային կեանքեր:
Հիմա Հայաստանի Հանրապետութիւնը կը նմանի այդ ԵրԱԶ մեքենային, 1990 թուականին գործարանէն “նոր” դուրս գրուած. հաշուի առնելով սովետական աւանդոյթները, կրնանք պատկերացնել թէ ինչ վիճակ ունէր ան իր ծննդեան օրերուն: Երեսուն տարի այս մեքենան քշուեցաւ ու դեռ կը քշուի, հա նորոգուեցաւ ու դեռ կը շարունակուի նորոգուիլ, ատեն ատեն խղճամիտ, շատ յաճախ ալ անվստահելի կամ համբակ վարպետներու ձեռքով: Ծառայեց մարդոց, բայց աւելի շատ աչքի ինկաւ պատճառած վթարներով, վթարներն ալ` բազմաթիւ զոհերով: Շատ շատեր ալ, վախցած ու զզուած, այլեւս չուզեցին ԵրԱԶ նստիլ, ու փնտռեցին իրենց կեանքի մեքենան` այլ երկինքներու տակ:
Հիմա հարցը յստակ է. ԵրԱԶը այլեւս ինչպէս կրնայ դիմանալ արդէն շատ լայնցած մայրուղիներու վրայ սուրացող այլ ինքնաշարժներու հետ մրցավազքին… եթէ նոյնիսկ շատ զոռի բերուի: Շատ զոռի բերուի` կրնայ շարժիչը զարնուիլ, կամ մեքենան մայրուղիէն դուրս թռչիլ… Խնդիրը արդէն շատ պարզ է. ԵրԱԶը պէտք է փոխարինուի. մարդիկ կարիքը ունին այլ մեքենայի. եւ ինչպէս ՖՊ ընկերս կ’ակնարկէ` նաեւ նոր վարորդի:
ՎԱՐԴԱՆ ԹԱՇՃԵԱՆ
