«Հրապարակ» թերթը կը գրէ՝
«Պատմութիւնը կրկնւում է։ Մէկ էլ 2018-ի աշնանն էին նոր-նոր իշխանութեան եկած Նիկոլ Փաշինեանն ու թիմն այսպիսի ցայտնոտի մէջ։ Ընդամէնը օրեր առաջ հասարակութեանը 6 ամսից՝ 2019-ի գարնանը ԱԺ ընտրութիւններ խոստացող յեղափոխականները յանկարծ որոշեցին, որ արագութեամբ պէտք է ընտրութիւններ անցկացնեն, եւ անգամ հրաժարուեցին Ընտրական օրէնսգիրքն ու ռէյթինկային (համամասնական) համակարգը փոխելու մտքից ու հապճեպ ընտրութիւնների գնացին հին օրէնսգրքով։
Նրանք հասկանում էին, որ իրենց ռէյթինկն օրէցօր նուազելու է, եւ եթէ ուզում են ողջ իշխանութիւնն ամբողջութեամբ եւ միանգամից, պէտք է շտապեն։ Եւ արդիւնքում ունեցանք խորհրդարանական ընտրութիւններ ոչ թէ գարնանը, երբ էյֆորիան (գերերջանկութիւն-Խմբ.) որոշակիօրէն նուազած կը լինէր, քաղաքական դաշտը կայունացած, եւ նորմալ քաղաքական խորհրդարան կձեւաւորուէր՝ մի քանի քաղաքական ուժերի՝ իրար հաւասարակշռող բազմազանութիւնից կազմուած, այլ ունեցանք 88 հոգուց կազմուած մի անճոռնի գոյացութիւն եւ օրէնքի ուժով՝ պոնուսներով աճեցուած 2 քաղաքական ուժ, որոնք ոչ մի առաւելութիւն չունէին ԱԺ չանցած ուժերի նկատմամբ, եթէ չասենք՝ զիջում էին նրանց։
Հիմա նոյն իրավիճակն է․ Նիկոլ Փաշինեանն ու թիմը հասկանում են, որ ընտրութիւնների ամէն օր յետաձգումը նուազեցնում է իրենց՝ վերարտադրուելու առիթները, որովհետեւ հորիզոնում ընկերային-տնտեսական, նիւթական ճգնաժամն է նշմարւում, եւ աշնանը մենք ունենալու ենք բոլորովին այլ քաղաքական վիճակ։ Եւ որպէսզի որքան հնարաւոր է մեծ կտոր փրցնել իշխանական թորթից (կարկանդակ), հարկաւոր է օր առաջ ընտրութիւններ կազմակերպել։ Թէեւ խելացի եւ բարոյական լինելու դէպքում պէտք է ինքնակամ հրաժարուէին իշխանութիւն կոչուող բեռից, քանզի այս 2 տարին պէտք է բաւական լինէր՝ համոզուելու համար, որ ձախողել են, եւ ճիշդը հեռանալն է»,-գրած է թերթը:
