Յովհաննէս Մինաս (հոլանտերէն՝ Johannes de Minas, նաեւ Johannes di Minas) (անյայտ — 1768, Ամսթերտամ, Հոլանտա), հայ հոգեւորական :
1733 թուականին Օսմանեան կայսրութենէն տեղափոխուած է Հոլանտա, իսկ 1734 թուականէն մինչեւ մահը՝ 1768 թուական, եղած է Ամսթերտամի հայկական եկեղեցւոյ քահանայ (եկեղեցին բացուած է 1714 թուականին եւ կը ծառայէր Ամսթերտամի հայկական համայնքին)։
Յովհաննէս Մինաս բնակած էր Քոնինգսթրատ փողոցի 27 հասցէին վրայ, ուր տակաւին պահպանուած է անոր անունը կրող հայերէն յուշաքարը: Անոր միջոցներով նաեւ 1749 թուականին ստեղծուած է հայկական եկեղեցւոյ յուշաքարը։
Մահէն ետք աճիւնը ամփոփուած է Աուտեկերկ եկեղեցւոյ գերեզմանատան մէջ (տապանաքար հ. 444): 20 Յունուար 2008-ին այս եկեղեցիին մէջ կատարուած է անոր յիշատակին նուիրուած արարողութիւնը։ Նոյն տարին հոլանտացի պատմաբաններ Ռընէյ Պեքիուսը եւ Վաութ Ուլթէյը հրատարակած են «Ամսթերտամի Աուտեկերկի 1661-1808 թուականներուն հայկական գերեզմանները» գիրքը:
