Հայաստանեան Մամուլի Տեսութիւն
«Փաստ» օրաթերթը կը գրէ. «Մասնագէտների համոզմամբ, ճգնաժամային իրավիճակը, որն ուղղակիօրէն պայմանաւորուած էր «Քորոնա» ժահրով, Արցախեան վերջին պատերազմով եւ ՀՀ իշխանութիւնների անպտուղ ու անբովանդակ գործունէութեամբ (ոմանց կարծիքով՝ անգործութեամբ), շարունակւում է բոլոր ոլորտներում, այդ թւում՝ ընկերային-տնտեսական։ Մեզ հետ զրոյցում բազմաթիւ տնտեսագէտներ քանիցս փաստել են, որ առկայ իրավիճակը յանգեցնելու է ՀՀ-ում աղքատութեան շեմի կտրուկ բարձրացման։ Աւելին, նրանց կարծիքով, մենք ուղղակիօրէն գնում ենք հենց այդ ճանապարհով: Արդէն ակնյայտ է, որ սպառողական շուկայում առկայ է բաւականին մեծ գնաճ, ինչն ուղղակիօրէն իր ազդեցութիւնն է ունենալու առաջին հերթին հասարակութեան յատկապէս անապահով հատուածի վրայ։ Ինչպէս յայտնի է, 2019 թուականին ՀՀ-ում աղքատութեան մակարդակը կազմել է բնակչութեան ընդհանուր թիւի 26, 4 տոկոսը։
Դեռեւս չեն հրապարակուել 2020 թուականի ցուցանիշները, սակայն, ըստ որոշ մասնագէտների, 2020-ի ցուցանիշն աւելի բարձր է լինելու: Աւելին, կանխատեսւում է, որ արդէն այս տարուայ առաջին կիսամեակում այն կը հասնի մօտաւորապէս 30 տոկոսի, հնարաւոր է՝ նաեւ անցնի։ Առաւել եւս, որ շատ մասնագէտների կարծիքով, այսպէս շարունակուելու դէպքում ապրիլից կունենանք թոշակների, աշխատավարձերի, նպաստների ուշացումներ՝ դրանից բխող բացասական հետեւանքներով: Մեր աղբիւրի փոխանցմամբ, այս մասին յայտնել են Նիկոլ Փաշինեանին, որը բաւականին նիարդայնացել է՝ յորդորելով ամէնամեայ տեղեկութիւնները հրապարակել հնարաւորինս ուշ, իսկ հնարաւորութեան դէպքում առաւելագոյնս այնպէս անել, որ ներկայացուող թուերը իրականութեան հետ կապ չունենան եւ «ապացուցեն», որ երկրում ամէն ինչ հրաշալի է»:
