Փետրուարի 5-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը հանդիպում ունեցաւ կրթութեան, գիտութեան, մշակոյթի եւ մի շարք այլ բնագաւառներում յաջողութիւններ արձանագրած, մրցանակակիր եւ հայրենի կեանքում զգալի ներդրում ունեցած երիտասարդների հետ։ Ս․ Սարգսի տօնի առիթով աւանդաբար կազմակերպուող այս հանդիպումը նախաձեռնուել էր Հայ Եկեղեցու Համաշխարհային երիտասարդական միաւորման (ՀԵՀԵՄ) կենտրոնական գրասենեակի կողմից։
Հանդիպմանը ՀԵՀԵՄ հոգեւոր տեսուչ եւ կենտրոնական գրասենեակի տնօրէն Հոգեշնորհ Տ. Թովմայ վարդապետ Խաչատրեանը Նորին Սրբութեանը ներկայացրեց մասնակից երիտասարդներին՝ մասնաւորապէս կարեւորելով կապը Եկեղեցու եւ երիտասարդութեան միջեւ:
Այնուհետեւ հայորդիներին իր հայրական օրհնութիւնը բերեց Ամենայն Հայոց Կաթողիկոսը՝ բարձրօրէն գնահատելով ջանադիր եւ հետեւողական աշխատանքով կերտուած այն յաղթանակներն ու յաջողութիւնները, որ երիտասարդներն արձանագրել են իրենց անձնական կեանքում, տարբեր ոլորտներում եւ միջազգային հարթակներում՝ բարձր պահելով հայ ժողովրդի պատիւն ու բարի համբաւը։ Վեհափառ Հայրապետը հաստատեց, որ յաջողութիւնները քրտնաջան աշխատանքի եւ բարձր գիտակցութեան արդիւնք են՝ վստահութիւն յայտնելով, որ նման ոգով առաջնորդուող երիտասարդները կարող են կերտել լուսաւոր ապագայ եւ հայրենի երկրի համար ապահովել առաջընթաց ու բարգաւաճում։
Այս առիթով Նորին Սրբութիւնը իր գնահատանքը բերեց ՀԵՀԵՄ-ի կենտրոնական գրասենեակին՝ շնորհալի երիտասարդներին համախմբելու, միմեանց ծանօթացնելու եւ Հայ Եկեղեցու առաքելութեանը հաղորդ դարձնելու համար։
Վեհափառ Հայրապետը նաեւ պատասխանեց երիտասարդների տարբեր հարցերին։ Անդրադարձ կատարելով յետպատերազմեան հետեւանքների յաղթահարմանը եւ երկրում տեղ գտնող զարգացումներին՝ հայրենիքը ստեղծուած ցաւալի ու ծանր իրավիճակից դուրս բերելու եւ առկայ մարտահրաւէրներն ու դժուարութիւնները յաղթահարելու գործում Ամենայն Հայոց Կաթողիկոսը կարեւոր նկատեց, որ հայորդիները դրսեւօրէն հայ ժողովրդին բնորոշ արիութիւն՝ խոհեմութեամբ եւ իմաստութեամբ ի գործ դնելով բոլոր ճիգերը։ Նորին Սրբութիւնը ընդգծեց, որ այսօր ազգի անխտիր իւրաքանչիւր զաւակի ջանքն ու ներդրումն է ակնկալւում՝ դուրս բերելու հայրենիքը այս ծանր փորձութիւնից։
Խօսուեց նաեւ ազգային կեանքը յուզող զանազան խնդիրների, ինչպէս նաեւ Եկեղեցու առաքելութեան իրականացման գործում տեղեկատուական միջոցների առաւել արդիւնաւէտ գործածման կարեւորութեան մասին։
Հանդիպմանը Կոմիտասի «Հորովել»-ի կատարումով երիտասարդները մխիթարութիւն պարգեւեցին Հայոց Հովուապետին։
Վերջում Նորին Սրբութիւնը աղօթք բարձրացրեց Հայաստանի, Արցախի եւ հայ ժողովրդի խաղաղ ու ապահով կեանքի համար՝ յորդորելով երիտասարդներին իրենց աշխատասիրութեամբ ու գիտելիքներով նորանոր յաջողութիւններ արձանագրել՝ ի փառս եւ ի բարօրութիւն հայ ժողովրդի եւ հայրենի երկրի։
