Վերջին աւելի քան մէկ տարուայ ընթացքին Լիբանան կը դիմագրաւէ իր ժամանակակից պատմութեան ամէնադժուարին իրավիճակը: Տնտեսական եւ ապահովական անտանելի ճգնաժամ կ՛ապրի երկիրը, ուր քաղաքացիներուն մեծ մասը կը տառապի անգործութենէ ու չքաւորութենէ, կ՛ապրի անարդարութիւն եւ զրկանքներ: Մինչ երկրին ղեկը ստանձնած քաղաքական գործիչները, ոչ միայն անկարող են երկիրը դուրս բերել ստեղծուած անելէն, այլ իրականութենէ կտրուած՝ զարմանալի ինքնակեդրոնութեամբ մը, աւելի եւս կը խոչընդոտեն լիիրաւ պետութիւն մը ունենալու լիբանանցի անհատին տարրական իրաւունքը: Անոնք իրենց գործելաոճով անդամալուծած են պետական հաստատութիւնները եւ հատուածապաշտ ու ագահ պահուածքով մը կը ձգտին միայն ու միայն անձնական շահերու եւ իշխանութեան իւրացման: Պետութեան վերահսկողութենէ դուրս զէնքի գոյութիւնը լուրջ վտանքներու առջեւ կը դնէ բոլորս: Կառավարութեան կազմութիւնը ամօթալի քաշքշուքով մը տակաւին կը յամենայ: Փտածութիւնը ո՛չ մէկ սահման կը ճանչնայ, մինչ ժողովուրդին կամքը, կեանքն ու բարօրութիւնը անտեսելն ու շահագործելը դարձած է յոռի եւ անուղղելի նորմ:
Ի տես այս անտանելի իրավիճակին, Պշարա Ռաաի Պատրիարքի վերջին կուռ կեցուածքները մերժելու անընդունելին՝ աւելի քան ողջունելի են: Մենք կը հաւատանք, որ Եկեղեցին խիղճն է իր երկրին եւ հոն ուր պետութիւնը կը ձախողի ու քաղաքական ղեկավարութիւնը կը խարխաբէ երկիրն ու քաղաքացին դնելով անտէր իրավիճակի մը մէջ, Եկեղեցին իր դերը ունի կատարելիք: Հարիւր տարի առաջ օսմանեան լուծէն դուրս գալու համար, Պըքրքէն մեծ դեր ունեցած է ազատագրելու երկիրն ու հասարակութիւնը՝ հիմնելու Մեծն Լիբանանը: Այսօր Լիբանանի երկնակամարը նոյնքան մութ է եւ ահաւասիկ նոյն եկեղեցիին պետը իր ձայնը կը բարձրացնէ ի դէմս անարդարութեան ու կեղեքումին՝ միջազգային ընտանիքէն պահանջելով Լիբանանի համար յատուկ համաժողով մը փրկելու համար երկիրն ու քաղաքացին, կամ ինչ որ մնացած է անկէ:
Ռամկավար Ազատական Կուսակցութեան Լիբանանի Շրջանային Վարչութիւնը դատապարտելով սոյն իրավիճակին բոլոր պատասխանատուները, իր ամբողջական զօրակցութիւնը կը յայտնէ Ռաաի Պատրիարքին ճիգերուն, որովհետեւ մեծապէս կը հաւատայ Պըքրքէի դերին ու առաքելութեան:
ՌԱԿ անվերապահօրէն կը կանգնի Պատրիարքի կողքին յանուն Լիբանանի ու իր ժողովուրդին վերականգնումին ու հզօրացման:
ՌԱԿ Լիբանանի Շրջանային Վարչութիւն
