Առանց երկարաշունչ նախաբանի կամ պատմականի, այսօր սոյն սիւնակով՝ ամենապարզ ձեւով հետեւեալ պատկերը կ՛ուզեմ ներկայացնել.
Տխրահռչակ 10 Նոյեմբեր 2020-էն մինչեւ այսօր, կրօնական, քաղաքական, եկեղեցական, միութենական, ակադեմական եւ այլ՝ հետեւեալ գերազգային եւ ծանրակշիռ հաստատութիւնները ծանօթ պատճառներով ՀՀ Վարչապետ Նիկոլ Փաշինեանին յորդորեցին կամ իրմէ պահանջեցին իր հրաժարականը. Մայր Աթոռ Ս. Էջմիածինը, Մեծի Տանն Կիլիկիոյ Կաթողիկոսութիւնը, Հայաստանի Հանրապետութեան Նախագահը, Ազգային աւանդական կուսակցութիւններ եւ միութիւններ, ներհայաստանեան մեծ թիւով ազդու քաղաքական կուսակցութիւններ, Հայաստանի Գիտութիւններու Ազգային Ակադեմիան, Երեւանի Պետական Համալսարանը, փաստաբաններու մեծ համախմբում մը, մեծ թիւով մտաւորականներ, արուեստագէտներ եւ վերջապէս Հայոց Բանակի սպայակոյտը:
25 Փետրուար 2021-ին Փաշինեան, իր հրաժարականը պահանջող Հայոց Բանակի սպայակոյտին ծանօթ յայտարարութիւնը համարեց՝ պետական յեղաշրջման փորձ:
Նիկոլ Փաշինեանին տուած այս նոյն որակաւորումը տուին եւ այսպէս կոչուած «զինուորական յեղաշրջումը» դատապարտեցին եւ մտահոգութիւն յայտնեցին.
- Թուրքիոյ նախագահ Ռէճէփ Թայիպ Էրտողանը:
- Թուրքիոյ արտաքին գործոց նախարար Մաուլուտ Չաւուշօլու՝ իր պաշտօնական յայտարարութեամբ:
- Թուրքիոյ նախագահ Էրտողանի պաշտօնական ներկայացուցիչ Իպրահիմ Քալինը՝ իր թուիթըրեան գրառումով:
- Թուրքիոյ իշխող «Արդարութիւն եւ Զարգացում» կուսակցութեան խօսնակ՝ Օմէր Չելիքը:
- Թուրքիոյ հիմնական ընդդիմադիր, «Քեմալական Հանրապետական Ժողովրդական» կուսակցութեան փոխ նախագահ՝ Օզկիւր Օզելը:
- Թուրքիոյ պաշտօնական կամ իշխանամէտ շատ մը լրատուական միջոցներ:
- Ազրպէյճանի պետական համակարգը:
- Ազերի լրատուական միջոցները:
- Ֆէյսպուքեան օգտատէր Վարդան Պալեանի կողմէ համադրուած՝ ազրպէյճանի հասարակութեան ընկերային համացանցի վրայ հետեւեալ (թարգմանուած) գրառումներու նմոյշները, որոնք մեծ ժողովրդականութիւն գտած են.
- Ճեյհուն Նեսիրով.
Չէի պատկերացներ, որ երբեւէ այսպէս կ՛ըսեմ, բայց իրապէս լուրջ՝ եկէք աղօթենք Նիկոլի համար։
- Նուրիտէ Շաֆակ.
Պինդ եղիր Փաշիկ, մենք քեզի հետ ենք:
- Շամիլ Աղա.
Նիկոլի հանդէպ յարգանքս կը մեծնայ։ Քանի դեռ ան կը դիմադրէ Ռուսաստանին, մենք հեռանալու ենք Ռուսաստանէն: Ես հայու հանդէպ այսքան յարգանք դեռ չեմ ունեցած։ Վերակենդանացիր Նիկոլ։ Անդրանիկի հոգին քեզ օգնական։
- Ճամիլա Իսմայիլզատա.
Եթէ գերիները վերադարձնէին, կրնայ ըլլալ Փաշինեանի աջակցութիւնը քիչ մը աւելի ըլլար։ Ցաւալի է, որ թէ՛ մենք, եւ թէ Հայաստանը կրկին կը գլորինք Քրեմլինի գիրկը:
Այսօր այսքանով պիտի բաւարարուիմ: Վերոյիշեալին եզրայանգումը ընթերցողին ձգելով:
ՍԵՒԱԿ ՅԱԿՈԲԵԱՆ
