Մայր Աթոռ Սուրբ Էջմիածնից Հայրապետական Մեր օրհնութիւնն ու ջերմ բարեմաղթանքներն ենք բերում տիկնանց եւ օրիորդներին` մարտի 8-ի տօնական առիթով:
Անփոխարինելի է կնոջ դերը ընտանիքի ամրութեան, քրիստոնէական արժէքներով եւ հայրենեաց աւանդներով մեր զաւակներին կրթելու գործում։ Կանայք անձնուրաց նուիրումի, սիրոյ ու քնքշանքի մարմնացումն են մեր կեանքում։
Յետպատերազմեան այս դժուարագոյն օրերին, երբ մեր երկիրը շարունակում է փոթորկուել ներքին ու արտաքին մարտահրաւէրներից, վստահութիւնն ունենք, որ մեր ժողովուրդը վերստին իր խաչի ճանապարհը պիտի հասցնի մինչեւ յաղթական յարութիւն։
Սիրելի մայրեր եւ քոյրեր, Մեր մաղթանքն է, որպէսզի դուք յոյսի ու մխիթարութեան մէջ դիմաւորէք մեծարանքի այս տօնը։ Աղօթում ենք, որ Տէրը Սուրբ Հոգու սփոփանքը պարգեւի պատերազմի ծանր կորուստների միջով անցած մեր մայրերին ու քոյրերին, ուժ ու կորով հաղորդի համայն մեր ժողովրդին՝ համակամ սիրով կերտելու լուսաւոր ու բարօր կեանքը հայրենիքի։ Թող Բարձրեալ Տէրը Իր Ամենախնամ Սուրբ Աջի հովանու ներքոյ պահի ու պահպանի ձեզ ամէնքիդ եւ բիւր օրհնութիւններով շնորհի արեւշող կեանքի խաղաղ եւ երջանիկ օրեր, լուսաւոր ու պայծառ նոր իրագործումներ, այսօր եւ միշտ. ամէն:
