Ռուսական RBK հեռուստաընկերութիւնը անդրադարձած է Հայաստանի մէջ տիրող քաղաքական իրավիճակին:
Հրապարակման մէջ մասնաւորապէս ըսուած է, որ Երեւանի կեդրոնին մէջ կրկին խոշոր բողոքի հաւաքներ են, ընդդիմութիւնը արգելափակած է Ազգային ժողովի մուտքերը. «Ամէն պարագայի քանի մը պատգամաւոր յաջողած է շէնք մտնել: Փաշինեանի եւ ընդդիմութեան հանդիպումը հնարաւոր է կայանայ 13 մարտին, այն առաջարկած է երկրի նախագահ Արմէն Սարգսեանը:
Վրանային ճամբարը Բաղրամեան պողոտային մէջ մեծցած է, ոստիկանութիւնը լրացուցիչ ուժեր ներգրաւած է: Այսօր հանդարտ է, սակայն երէկ բախումներ եղած են ցուցարարներու եւ ուժայիններու միջեւ»,- ըսուած է հաղորդման մէջ:
Հեռուստաընկերութիւնն անդրադարձած է նաեւ Նիկոլ Փաշինեանի՝ ԶՈՒ հրամանատարական կազմի հետ հանդիպման. «Փաշինեանը խոստովանած է, որ Հայաստանը դժուար ժամանակներ կ’ապրի, եւ կոչ ըրած է բանակի հրամանատարական կազմին շարունակել կատարել պարտականութիւնները եւ պահպանել երկրի անվտանգութիւնը: Աւելի վաղ Փաշինեանը գլխաւոր շտաբի պետի նոր թեկնածու առաջարկած էր՝ զօրավար-լեյտենանտ Արտակ Դաւթեանը, որ ղեկավարած է ՀՀ ԶՈՒ ԳՇ-ն 2018-ի մայիսէն 2020-ի յունիսը ինկած ժամանակահատուածին: Այն ժամանակ անոր աշխատանքէն ազատած էին «Քորոնա» ժահրային պայմաններուն իր տղուն հարսանիքը ընելու համար: Դաւթեանի նշանակման միջնորդութիւնը արդէն ստացած է նախագահը, որոշումը պիտի կայացուի 3 օրուայ ընթացքին: Փաշինեանի անունով կառավարութեան կայքին մէջ հրապարակուած հաղորդագրութեան մէջ ըսուած է, որ 10 մարտէն ԳՇ պետ Օնիկ Գասպարեանը կը համարուի պաշտօնէն ազատուած»:
«Ե՛ւ ժողովուրդի, ե՛ւ ընդդիմութեան պայքարը Փաշինեանի հրաժարականի պահանջով եղած է մինչեւ ԳՇ յայտնի յայտարարութիւնը, շարունակուած է ամբողջ այդ ժամանակահատուածին, որ իրաւական ընթացակարգ համարել, ի հարկէ, չենք կրնար: Այն կը շարունակուի նաեւ հիմա եւ համոզուած եմ, որ այն դեռ պիտի շարունակուի»,-մեկնաբանած է իրադարձութիւնները հասարակական-քաղաքական գործիչ Արման Սաղաթէլեանը:
Իրադրութիւնը մեկնաբանած է նաեւ քաղաքագէտ Հրանդ Մելիք-Շահնազարեանը. «Իրաւաբանօրէն սա չհիմնաւորուած գործընթաց է եւ այն բանէն ետք, երբ հրապարակուեցաւ ԳՇ յայտարարութիւնը, զօրավարները առանձին-առանձին եւ միասնօրէն յայտարարեցին, որ կը մնան իրենց կարծիքին առ այն, որ կը պահանջեն Նիկոլ Փաշինեանի հրաժարականը: Պարզ է, որ բանակին մէջ խնդիրները կը մնան, բանակը կը շարունակէ չվստահիլ Փաշինեանին, եւ թէ ինչ իրաւաբանական որոշում պիտի գտնուի ստեղծուած իրադրութեան վերաբերեալ, դեռ պարզ չէ»:
