Մեկնարկել է «Զարթոնք» ազգային քրիստոնեական նախաձեռնությունը. Հիմնադիրները նշում են, որ նախաձեռնության նպատակն է ծառայել պետականության ամրապնդմանը:
Նախաձեռնության մեկնարկը տրվել է ապրիլի 10-ին կայացած ասուլիս-քննարկմամբ:
«Արմենպրես»-ի հաղորդմամբ՝ միջոցառումը սկսվեց մեկ րոպե լռությամբ՝ հարգելով Արցախյան 44-օրյա պատերազմում զոհված նահատակների հիշատակը:
ՀՀ փաստաբանների պալատի նախագահ Արա Զոհրաբյանը լրագրողների հետ զրույցում նշեց, որ «Զարթոնք» նախաձեռնությունը նպատակ ունի կազմել ազգային ծրագիր:
«Մենք փորձելու ենք ծառայել մեր պետականության ամրապնդմանը, այսինքն՝ յուրաքանչյուր ոլորտ պետք է ուսումնասիրենք և վեր հանենք խնդիրները: Այսօր ազդարարում ենք մեր նախաձեռնության մեկնարկը, ինչից հետո կփորձենք համախմբում իրականացնել: Մենք ունենք երեք նպատակ՝ իրականացնել պատերազմի հետևանքով տուժածների պաշտպանություն՝ այդ թվում նաև ռազմագերիների, երկրորդը՝ կառուցել մեր պատկերացրած հզոր պետությունը, երրորդն էլ 2020 թվականի պատերազմի պատճառների վերհանմանը և պատասխանատուների պատասխանատվության ենթարկելուն նպաստելն է»,- նշեց Զոհրաբյանը:
Բեյրութի «Զարթօնք» օրաթերթի գլխավոր խմբագիր Սևակ Հակոբյանն էլ նշեց, որ իրենք ողջունում են նախաձեռնությունը:
«Մեր օրաթերթի անունն ու գաղափարախոսությունը համընկնում են այս նախաձեռնության հետ: Մենք փորձելու ենք համագործակցել նրանց հետ»,- ընդգծեց Հակոբյանը:
Ասուլիսի ընթացքում ներկայացվեցին նաև նախաձեռնության ստեղծման շարժառիթները, առաքելությունը, քրիստոնեական արժեքների և ազգային ինքնատիպության վրա հիմնված հզոր պետություն (ինքնիշխան, ժողովրդավարական, սոցիալական և իրավական) կայացնելու հիմնասյուները, նպատակները, պատկերացումները Արցախյան հարցի, Հայոց ցեղասպանության ճանաչման և այլ հարցերի վերաբերյալ:
