Հայատեացութեան հերթական դրսեւորում էր օրերս Պաքւում բացուած, այսպէս կոչուած, «Ռազմավարի զբօսայգին»՝ հայ զինուորականներին եւ ռազմագերիներին պատկերող անմարդկային, նուաստացուցիչ տեսարաններով։
Ազրպէյճանի ղեկավարութիւնը շարունակում է իրականացնել ազգամիջեան թշնամանքի հրահրման իր քաղաքականութիւնը՝ անտեսելով միջազգային մարդասիրական իրաւունքի հիմնարար նորմերը։ Այսօր ադրբեջանական բանտերում շարունակում են նեղութիւնների եւ չարչարանքների ենթարկուել գերեվարուած մեր զաւակները, տառապում են հազարաւոր տեղահանուած եւ ունեզրկուած ընտանիքներ, իսկ գրաւուած եւ յանձնուած արցախեան տարածքներում չեն դադարում վայրագութիւնները մեր հազարամեայ հոգեւոր-մշակութային ժառանգութեան նկատմամբ։
Մայր Աթոռ Սուրբ Էջմիածինը, դատապարտելով յետպատերազմեան շրջանում Ադրբեջանի հակամարդկային եւ հակաբարոյական գործողութիւնները, կոչ է անում միջազգային հանրութեանը, պատկան կազմակերպութիւններին ու կառոյցներին պատշաճ գնահատականի արժանացնել մարդու իրաւունքների կոպիտ ոտնահարման, ազգի արժանապատուութեան վիրաւորման այս երեւոյթները։
