Այսօր «Բարգավաճ Հայաստան» խմբակցությունը դիմել է ԱԺ՝ նիստ հրավիրելու առաջարկով և հիմա խորհրդի նիստում կքննարկենք ստեղծված իրավիճակը: Այս մասին լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ նշելով արտահերթ ընտրությունների չեղարկման հարցը դեռևս չի քննարկվում, քանի որ կա շատ ավելի կարևոր հարց:
«Այս պահին փաստաթղթերը մուտք են արվում ՀԱՊԿ-ի համապատասխան խողովակներով, Հայաստանը պաշտոնապես դիմել է ՀԱՊԿ-ին, ինչպես նաև Փաշինյանը դիմել է ՌԴ նախագահին փոխօգնության պայմանագրի շրջանակներում, նաև՝ ռազմական օգնության հարցով»,- ասաց Ալեն Սիմոնյանը:
ԱԺ փոխխոսնակը նշեց՝ սպասում են ՀԱՊԿ-ի պատասխանին:
«Չենք կարող ասել, որ Ադրբեջանը պատերազմ է հայտարարել Հայաստանին, այս պահին նման բաներ ասել չի կարելի: Որևիցե կրակոց, ընդհարում այս պահին չի եղել, տարբեր տեղաշարժեր, այնուամենայնիվ, եղել են»,- նշեց նա:
Հիշեցնենք՝ այս պահի դրությամբ Սյունիքի Սև լիճը գտնվում է թշնամու վերահսկողության տակ, իսկ ադրբեջանական ԶՈՒ-երը փորձել են դիրքային առաջխաղացում ապահովել Վարդենիսի և Սիսիանի սահմանային հատվածներում:
