ՌԻՄԱ ԵՍԱՅԵԱՆ
Դժուար է պատկերացնել անհատականութիւնն առանց ազգային լեզուի, մշակոյթի ու պատմութեան։ Այս առաքելութիւնն իր վրայ է վերցնում դպրոցն ու եկեղեցին։ Յատկապէս սփիւռքում հայոց հոգեւոր տաճարներն իրենց դռներն են բացում հայ մանուկների, պատանիների առջեւ՝ նպատակ ունենալու նրանց մէջ ներարկել հոգեւորը, ազգայինը, ինչը մարդուն տալիս է գիտակցութիւն եւ պապենական արմատներն ընկալելու փիլիսոփայութիւն։
ԱՄՆ Արեւմտեան թեմի բարեխնամ առաջնորդ, բարձրաշնորհ Տ. Յովնան արք․ Տէրտէրեանն իր մշտական հոգածութեան եւ խնամքի տակ է պահում հայկական շաբաթօրեայ վարժարանները, որոնց թիւը հասնում է շուրջ 20-ի ընդգրկելով 1500-ից աւելի աշակերտ։
Անցնող շրջանը լի էր դժուարութիւններով՝ կապուած համավարակի ու մեր հայրենիքի շուրջը ծաւալուած պատերազմի լարուածութեամբ։
«Փոքրիկ հրեշտակներ» շաբաթօրեայ դպրոցը, որը գործում է Առաջնորդանիստ Ս. Ղեւոնդեանց մայր տաճարի հովանու ներքոյ, նոյնպէս անցաւ այդ ծանր ճանապարհը։ ԱՄՆ արեւմտեան թեմի շաբաթօրեայ վարժարանների հոգեւոր տեսուչ եւ դպրոցի տնօրէն բարեշնորհ Յովհաննէս սարկաւագ Գումրույեանի, ինչպէս նաեւ կրթօջախի բազմափորձ ուսուցիչների նուիրումով, ուսումնական տարին դարձաւ արդիւնաւէտ։
Հարկ է նշել, որ հաստատութիւնը յաղթահարեց նաեւ առցանց ուսուցման դժուարութիւնները՝ օգտագործելով ամենայայտնի ու տարածուած համացանցային յաւելուածները։ Վերջիններիս գործածութիւնը թոյլ տուեց դասաժամը դարձնել տեսանելի եւ օգտաշատ։ Տարին դարձաւ տօնական, երբ երկրորդ կիսամեակում դպրոցն իր դռները բացեց առկայ ուսուցման համար։ Անհրաժեշտ բոլոր կանխարգելիչ միջոցառումներն արուեցին, որպէսզի աշակերտներն ու ուսուցչական կազմը զերծ մնան հիւանդութեան տարածման անցանկալի հետեւանքներից։ Կրթօջախը նորից լցուեց մեր հայ մանուկների հնչուն ձայնով, կարծես նորից վերածնուեց՝ ուրախ երանգ հաղորդելով ուսումնական պրոցեսին։ Իսկ այն աշակերտները, ովքեր ինչ-ինչ պատճառներով նախընտրեցին առցանց ուսուցումը, հաստատութիւնը նրանց եւս դասընթացին մասնակցելու հնարաւորութիւն ընձեռեց։
Ճիշտ է, տարին անսովոր սկիզբ եւ աւարտ ունեցաւ, բայց իրաւամբ կարելի ասել, որ պատուով արուեց ամեն ինչ. անգամ կազմակերպուեց առցանց հանդիպումներ առաջնորդ Յովնան սրբազանի, գիտակրթական յանձնախմբի ատենապետ դոկտոր Էլլի Անդրէասեանի հետ։ Մեծ եղեռնին նուիրուած յիշատակութեան ընթացքում նախորդ, ուսումնական տարուայ շրջանաւարտներին տրուեցին աւարտական վկայագրեր։ Որպէս յաւելում, այդ օրն այնքանով էր խորհրդանշական, որ սաները նահատակուած սրբերի առաջ լուռ երդում տուեցին երբեք չմոռանալ մայրենին, միշտ հաւատարիմ լինել ազգային արժէքներին ու հայրենիքին։
Ուսումնական տարեշրջանը վերջացաւ 2021 թ․-ի յունիսի 6-ին։ Աւարտական դասարանի սաները հաւաքուել էին հարազատ դարձաց Ս․ Ղեւոնդեանց մայր տաճարում, մասնակցելու Ս․ Պատարագի։ Քարոզից առաջ առաջնորդ Յովնան Սրբազանը շնորհաւորեց աւարտական 6-րդ դասարանի սաներին։ Ապա օրուայ պատարագիչ, Գուգարաց թեմի նորանշանակ առաջնորդ, գերաշնորհ Տ․ Յովնան եպս․ Յակոբեանի հետ կատարեցին շրջանաւարտների օրհնութեան կարգ եւ վկայականների բաշխում։
Լիայոյս ենք, որ նոր տարեշրջանում կրկին կը բացուեն «Փոքրիկ հրեշտակներ» շաբաթօրեայ դպրոցի հիւրընկալ դռները առկայ ուսուցման համար, եւ մեր հայ մանուկները հնարաւորութիւն կ՛ունենան շարունակել կրթուելու, մասնակիցը եւ ականատեսը լինելու մեր հայ մշակոյթի, ոսկեղենիկ մայրենիի ու մեր հայրենիքի բարգավաճմանն ու երազած ապագային։
2021-22 ուս․ տարուայ ընդունելութիւնն սկսուելու է յուլիսից, իսկ դասերը մեկնարկելու են սեպտեմբերի 11-ին։
