Տեղի Ունեցաւ Ընկ. Սեւակ Յակոբեանի Հանդիպումը «Զարթօնք» Ազգային-Քրիստոնէական Կուսակցութեան Անդամների Հետ
«Զարթօնք» Ազգային-քրիստոնէական կուսակցութեան հիմնադիր անդամ Վահագն Չախալեանի հրաւէրով կուսակցութեան Երեւանի գլխաւոր շտաբում տեղի ունեցաւ Լիբանանի «Զարթօնք» օրաթերթի գլխաւոր խմբագիր ընկ. Սեւակ Յակոբեանի ու կուսակցութեան գործիչների եւ անդամների հանդիպում-քննարկումը, որի ժամանակ ամփոփուեց քարոզարշաւի մէկ շաբաթը։ Հանդիպմանը ներկայ էր նաեւ կուսակցութեան նախագահ՝ Հայաստանի Փաստաբանների Պալատի նախագահ Արա Զոհրապեանը։
Յունիսի 7-ից մեկնարկել է նախընտրական քարոզարշաւը, որին աշխոյժ կերպով մասնակցում է նաեւ նորաստեղծ «Զարթօնք» կուսակցութիւնը։ Կուսակցութիւնը քարոզարշաւի մեկնարկը տուել էր Երեւանի Սուրբ Աննա եկեղեցուց, որը յատուկ խորհրդանշական քայլ էր։ Կուսակցութեան գաղափարախօսութիւնը, ընտրուած 4 սրբութիւն համարուող խորհրդանիշերը՝ Ընտանիք, Եկեղեցի Բանակ, Պետականութիւն, խոստումնալից են ու տարբերւում են միւս կուսակցութիւնների գաղափարախօսութիւնից։
Հանդիպման ժամանակ Սեւակ Յակոբեանը, որպէս իրադարձութիւններին անմիջական մասնակցութիւն չունեցող անձ, իր առարկայական դիտարկումները տուեց ու խորհուրդները կիսուեց ներկաներին։ Յակոբեանը, նախ շնորհակալութիւն յայտնեց ներկաներին ընտրարշաւի ծանր օրուայ աւարտից յետոյ այս հանդիպմանը ներկայ լինելու համար, ապա նշեց՝ քաղաքական այս բարդ իրավիճակում իրենց արածը իսկական խիզախութիւն է։
«Ձեր արածը նաեւ մեծ փորձառութիւն է ապագայի համար։ Անգամ, եթէ բախտ չվիճակուի յայտնուել խորհրդարանում, յուսահատուել պէտք չէ։ Նման փորձառութիւն, նման կուսակցութիւն պէտք է լինի Հայաստանի քաղաքական դաշտում։ Պէտք է առաջ գնալ։ Դուք երիտասարդ էք, իսկ քաղաքականութիւնը երկարաշունչ է։ Այն, ինչ ես տեսնում եմ ձեր մէջ, այն ինչ դուք անում էք հոյակապ բան է»,- ասաց Յակոբեանը»։
Անդրադառնալով քաղաքական իրավիճակին ու 2018 թուականին Հայաստանում տեղի ունեցած դէպքերին, բանախօսը նշեց՝ իր ներկայացուցած օրաթերթը ու անոր հովանի կազմակերպութեան Լիբանանեան կառոյցը, առաջին իսկ րոպէից վստահ էին, որ լաւ բանով չի աւարտուելու դա եւ այդ փոփուլիստական շարժումը Հայաստանը ոչ մի լաւ տեղ չի տանելու։ Այս մասին լաւապէս կը վկայեն թերթին վերջին երեք տարուան առաջնորդող յօդուածներն ու որդեգրած ուղեգիծը:
«Դժբախտաբար այդպէս էլ եղաւ ու սա շատ ծանր նստեց Հայաստանի վրայ։ Յունիսի 20-ը կարծում եմ հնարաւորութիւն է այս պատմական թիւրիմացութիւնը շտկելու համար»,- իր նախաբանի խօսքում ասաց Լիբանանի հայկական «Զարթօնք» օրաթերթի գլխաւոր խմբագիրը։
Գալով այս օրերին «Զարթօնք» կուսակցութեան կողմից իրականացուող քարոզարշաւին ու թեքնիք մի քանի խնդիրներին, Յակոբեանն առաջարկեց նախ ընկերային համացանցի հարթակները ամբողջութեամբ օգտագործել տեղեկատւութեան տարածման համար։
Նա շեշտեց, որ քարոզարշաւների ժամանակ չափազանց կարեւոր է փողոցներում, բակերում մարդկանց հետ դէմ առ դէմ շփումը, հայեացքների փոխանակումը, որը մարդկանց վրայ կարող է մեծ ազդեցութիւն ունենալ ու ընտրութեան գնալիս իր որոշիչ դերը խաղալ քուէարկութեան վրայ։
«Երբ թռուցիկներ էք բաժանում, դա պէտք է կատարել այն պէս, որ այդ ընթացքում մարդկանց հետ անձամբ շփում տեղի ունենայ։ Խօսել, համոզել, բացատրել։ Դրանք շատ կարեւոր են։ Մարդիկ տպաւորւում են անգամ օծանելիքի բոյրով, կը մտապահեն քուէաթերթիկի համարը, ձեռքսեղմումը, այն բաժանողի դէմքը եւ այլն։ Թռուցիկ բաժանելիս պէտք է անձնական շփման մէջ մտնել քաղաքացու հետ, որպէսզի նրա մէջ տպաւորուի այդ հանդիպումը ու վերջիվերջոյ կարողանաս ավելի մանրամասն ներկայացնել կուսակցութեան առաքելութիւնը։ Յունիսի 20-ին դա կարող է վճռորոշ լինել»,- մանրամասնեց Յակոբեանը։
Ընդհանուր առմամբ, Յակոբեանը ողջունեց կուսակցութեան այսչափ աշխոյժ գործունէութիւնը եւ յոյս յայտնեց նրանց տեսնել առաջիկայ խորհրդարանում։ «Անգամ եթէ խորհրդարանում չլինէք, յուսահատուել պէտք չէ, կուսակցութեան գաղափարախօսութիւնն ու դաւանանքը շատ լաւն են, քաղաքական դաշտում դրա առկայութիւնը միայն ողջունելի է ու կարող է շատ դրական պտուղներ տալ»,- իր խօսքը եզրափակեց Սեւակ Յակոբեանը, ապա շեշտեց՝ «Զարթօնք» օրաթերթը իրենց կուսակցութեան կողքին է ու տեղեկատուական հարթակում պատրաստ է աջակցութիւն ցուցաբերել։
Ներկաները իրենց հետաքրքրող հարցերը ուղղեցին Սեւակ Յակոբեանին, որից յետոյ շնորհակալութիւն յայտնեցին արդիւնաւէտ ու անհրաժեշտ հանդիպման համար։
Քրիստինա Աղալարյան
