Համացանցում տեղեկություն տարածվեց, թե հայ-ադրբեջանական սահմանի Երասխի ուղղությամբ ինտենսիվ փոխհրաձգություն է տեղի ունենում և հայկական կողմը ունի զոհ և վիրավոր։
Արարատի մարզպետ Սեդրակ Թևոնյանը Chap.am-ի հետ զրույցում հայտնեց, որ այս պահին հայ-ադրբեջանական սահմանի Երասխի հատվածում հանգիստ է։ Մարզպետը նաև նշեց, որ եղել է միջադեպ, կրակոցներ, սակայն կարճ է տևել։ Վիրավորների կամ զոհերի մասին մարզպետը տեղեկություն հայտնել չկարողացավ։ Նշենք, որ փորձեցինք նաև կապ հաստատել Երասխ համայնքի ղեկավարի հետ, սակայն մեզ փոխանցեցին, որ վերջինս տվյալ պահին զբաղված էր։
Հիշեցնենք, որ ադրբեջանական կողմը տեղեկություն էր տարածել, թե ՀՀ ԶՈՒ ստորաբաժանումները կրակ են բացել հայ-ադրբեջանական սահմանի արևելյան հատվածում տեղակայված ադրբեջանական մարտական դիրքերի ուղղությամբ։ ՀՀ պաշտպանության նախարարությունը հերքել է այդ ապատեղեկատվությունը, նշելով, որ իրադրությունը հայ-ադրբեջանական սահմանին հարաբերականորեն կայուն է և գտնվում է ՀՀ ԶՈՒ լիարժեք վերահսկողության ներքո։
