«Բարձր պահենք Գուրգեն Յանիկյանի վառ հիշատակը, ով ցույց տվեց թե հայ ժողովրդի պատմության ամենադժվարին պահերին որքան կարեվոր է հայ անհատի դերը․․․». Սոյն կոչով «Հայաստանի ժողովրդական շարժում» հայրենասիրական-հասարակական կազմակերպությունը «Եռաբլուր» պանթեոնում կատարեց Գուրգէն Եանիկեանի նվիրված հիշատակի ու խնկարկման արարողություն։
Գուրգեն Յանիկյանը 1973 թ․ հունվարի 27-ին 13 փամփուշտ էր արձակել Սանտա Բարբարայում Թուրքիայի հյուպատոսի ու փոխհյուպատոսի վրա, ինչի համար դատապարտվել է ցմահ ազատազրկման, սակայն ծերության պատճառով 8 տարի անց ազատ է արձակվել։ Յանիկյանը մահացել է 1984 թ․։ Նրա աճյունասափորը հայրենիքում՝ «Եռաբլուր» զինվորական պանթեոնում, ամփոփվեց 2019 թ․ մայիսի 5-ին։
Արդարեւ երեկ՝ մարտի 27-ին, ժամը 12։00-ին «Եռաբլուր» պանթեոնում տեղի ունեցավ հիշատակի ու խնկարկման արարողություն։
Միջոցառման կազմակերպիչ կազմակերպության ներկայացուցիչ՝ Վազգեն Պետրոսյանը այնտեղ արտասանած իր խոսքին մէջ ըսաւ. «Այսօր մենք հիշում և ոգեկոչում ենք մեր ծերունի հերոսին, որը 78 տարեկան հասակում զենք վերցրեց և հայ ժողովրդի վրեժը լուծեց։ Նա ցույց տվեց, որ թուրքի հետ պետք է խոսել իր՝ զենքի լեզվով։ Մենք մեր երկրի մեջ, մեր հողի մեջ, որտեղ պապենականորեն 5000 տարի ապրում ենք, կռիվ ենք տալիս մեր գոյության համար այսօր։ Հայ ժողովուրդը այսօր կորցրել է իր տեղն ու դերը, քանի որ ձախողվել և դավաճանվել է ներսից։ Հայը մեկ անգամ էլ պետք է հավաքի իր ուժերը և ցույց տա աշխարհին, որ հայի հետ չեն խոսում «դու»-ով։ Երբ հայը կորցրեց ամբողջական Հայաստանի իր տեսլականը, սկսեց պարտվել, դարձավ չարչի և ողորմելի, քանի որ չուներ ապագայի տեսլական։ Ներկա պահին Հայաստանի քաղաքական դաշտում տեղի է ունեցել երկրաշարժ, քանդվել է հայոց պետականությունը, քանդվել են Հայաստան-Սփյուռք հարաբերություններ։ Հիմա պետք է այս շինաղբը թափել, ստեղծել նոր պետություն՝ նոր հիմքի վրա և թույլ չտալ, որ հայի արգանդը ծնի դավաճաններ, ովքեր կդավաճանեն հայ զինվորին, հայոց հողին, հայոց գրին և հայոց գրականությանը։ Յանիկյանը իր օրինակով ցույց տվեց, որ հայ անհատը՝ 78-ամա ծերունին, կարող է հայ ժողովրդի պատմության ընթացքը փոխել։ Յանիկյանից ընդամենը 2 տարի հետո ծնվեց Հայաստանի ազատագրության հայ գաղտնի բանակը, որը 8 տարվա կռվի ընթացքում թուրքերին ահ ու սարսափի մատնեց։ Թուրքը, որ ՆԱՏՕ-ի երկրորդ մեծ ուժն է, սարսափի մեջ էր ամբողջ աշխարհում։ Հայ անհատները կատարեցին 320-ից ավելի գործողություն, սպանեցին 42 թուրք դիվանագետ»:
«Եռաբլուր» զինվորական պանթեոնում տեղի ունեցած հիշատակի ու խնկարկման արարողության ժամանակ խոսքի առին նաեւ ծանոթ մտավորական, գրող եւ հրապարախոս՝ Կարո Վարդանյան ինչպես նաեւ գրող, բանաստեղծ եւ հրապարակախոս՝ Վարուժան Ղազանջյան:
Հատկանշական էր Հայկական շաբաթօրյա դպրոցի (Սուրբ Խաչի կիրակնօրյա դպրոց) աշակերտներուն այցելությունըհայ ազատագրական գաղտնի բանակի կնքահայր Գուրգեն Յանիկյանի գերեզմանին։ Այս մասին կը նշէ նաեւ դպրոցին ֆեյսպուքի էջը, ուր շնորհակալության խոսք կա տիկին Ալլային՝ դպրոցի սաներին Յանիկյանի մասին կարևոր դրվագները պատմելու համար։
Նշենք, որ Հայաստանի ազատագրության հայ գաղտնի բանակի կնքահոր՝ Գուրգեն Յանիկյանի իրականացրած գործողության 50-ամյակին ընդառաջ «Հայաստանի ժողովրդական շարժում» հայրենասիրական-հասարակական կազմակերպությունը տարին հայտարարել է յանիկյանական ու նախաձեռնել «Նպատակ եւ ճշմարտություն» խորագրով միջոցառումների շարք:
