Կիրակի 3 Ապրիլ 2022-ի երեկոյեան «Պէյրութ Առաջին» ընտրաշրջանի երեսփոխանական թեկնածու՝ Փոլա Եագուպեան եւ իր ցանկակիցները այցելեցին Թէքէեան Կեդրոն՝ հիւրերը հանդիսանալով ՌԱԿ Լիբանանի Շրջանային Վարչութեան: Եագուպեանին կ՛ընկերակցէր նաեւ «Պեքաա Առաջին» Զահլէի ընտրաշրջանի երեսփոխանական թեկնածու՝ Զօրավար Նարեկ Աբրահամեանը:
Հիւրերուն դիմաւորեցին, ՌԱԿ Լիբանանի Շրջանային Վարչութեան ատենապետ՝ ընկ. Սեւակ Յակոբեանը, ԹՄՄ Հիմնադիրներու Մարմնի ատենապետ եւ ՌԱԿ-ի նախկին երեսփոխան՝ ընկ. Յակոբ Գասարճեանը եւ ՌԱԿ-ի ու ԹՄՄ-ի Լիբանանի շրջանակը ներկայացնող՝ պատասխանատու ընկերուհիներ եւ ընկերներ:
Հանդիպման ընթացքին կողմերը միասնաբար քննարկեցին Լիբանանն ու լիբանանահայութիւնը յուզող հարցեր: Փոլա Եագուպեան ներկայացուց իր ցանկին ծրագիրը եւ պատասխանեց իրեն ուղղուած հարցումներուն:
Ընկ. Յակոբեան դրուատիքով խօսեցաւ Եագուպեանի արժանիքներուն մասին եւ ջատագովեց յանուն Լիբանանի քաղաքացիին բարօրութեան եւ գերիշխան ու փտածութենէ զուրկ երկիր մը ունենալու իր տեսլականն ու տարած աշխատանքները: ՌԱԿ-ի Լիբանանի ատենապետը շրջանակին անունով ամբողջական զօրակցութիւն յայտնեց Փոլա Եագուպեանին ու իր ցանկին, ինչպէս նաեւ Զօր. Նարեկ Աբրահամեանի թեկնածութեանց: Ընկ. Յակոբեան իր խօսքին մէջ շեշտեց, թէ Եագուպեանի քաղաքական ու ընկերային հայեացքները մեծապէս կը համընկնին ՌԱԿ-ի Լիբանանի հանդէպ ունեցած տեսլականին հետ եւ հետեւաբար այս առումով Եագուպեան լաւապէս կը ներկայացնէ ՌԱԿ-ը, ինչպէս ՌԱԿ-ը իր կարգին՝ կը ներկայացնէ Եագուպեանը:
Փոլա Եագուպեան շնորհակալութիւն յայտնեց իր անձին եւ իր ծրագիրներուն հանդէպ ՌԱԿ-ի ցուցաբերած վստահութեան համար: Ան մեծապէս գնահատեց Ռամկավար Ազատական Կուսակցութեան ազգանուէր ու անաչառ կեցուածքներն ու ազատ, անկախ եւ գերիշխան Լիբանանի ու առողջ հաւաքականութեան հանդէպ ունեցած սկզբունքային մօտեցումները:
Զօր. Աբրահամեան իր կարգին կարեւորեց Լիբանանի հայկական համայնքին գործօն մասնակցութիւնը համալիբանանեան քաղաքական կեանքին մէջ եւ շեշտը դրաւ անոր առաջանորդողի դեր ստանձնելուն վրայ:
Ընկ. Յակոբ Գասարճեան բարի գալուստ մաղթեց հիւրերուն, շեշտելով, որ Թէքէեան Կեդրոնը տունն է իւրաքանչիւր հայորդիի, որ կ՛աշխատի Լիբանանի եւ լիբանանահայ համայնքին համար:
Մտերմիկ հանդիպման մթնոլորտին մէջ ընկ. Յակոբեան, Փոլա Եագուպեանի ծննդեան տարեդարձին նախօրէին զուգադիպող այս այցելութեան առիթով անակնկալ մը մատուցեց հիւրին, միասնաբար նշելու իր տօնը:
Հանդիպման աւարտին կողմերը իրար շնորհաւորեցին եւ յաջորդող օրերուն գործակցութիւնը աւելի եւս սերտացնելու պատրաստակամութիւն յայտնեցին:
Նշենք, որ այս տարի Լիբանանի երեսփոխանական ընտրութիւնները, ծրագրուած են, որ տեղի ունենան յառաջիկայ Մայիսի 15-ին:
ՌԱԿ Լիբանանի Շրջանային Վարչութեան
Տեղեկատուական Գրասենեակ
