«Հայրենիք» կուսակցության ու խորհրդարանական «Պատիվ ունեմ» խմբակցության առաջնորդ Արթուր Վանեցյանը, ով այս օրերին Ֆրասիայի հրապարակում մարդկանց է տեսնում, որոնք իր համար անընդունելի են: «Այդ մարդիկ հարված են հարսցնում շարժմանը»,- Armlur.am-ին տված հարցազրույցում նշեց Արթուր Վանեցյանը։
Նրա խոսքով՝ այն գործողությունները, որոնց մասին բարձրաձայնում են կամ իրենցից պահանջում, դրանք գործողություններ են, որոնք կբերեն Շարժման արագ մարմանը։
«Եթե մենք գրավենք Կառավարության շենք, դա մեզ ի՞նչ է տալու։ Դա իշխանություններին հնարավորություն է տալու ձերբակալել Շարժման առաջնորդներին, անդամներին, քաղաքացիներին և կասեցնել Շարժումը։ Մենք իրավունք չունենք նման գործողություններ թույլ տալ։ Եթե մենք հասկանանք, որ եկել հասել է այդ կրիտիկական պահը, հավատացեք մենք կդիմենք այդ քայլին։ Մենք հասկանում ենք, որ այս գործընթացը պետք է տեղավորվի օրենքի շրջանակում։ Այս շարժումն ունի իր հստակ ծրագիրը, որով շարժվում ենք։ Դուք տեսնում եք, որ օրեցօր մարդիկ շատանում են, կա հանրային կոնսենսուս, որ այս իշխանությունը պետք է օր առաջ հեռանա։ Մենք ծրագիր ունենք, մինչև վերջ գնալու ենք»,- ասաց Վանեցյանը։
Վանեցյանի խոսքով՝ իրենց շարժումը կուսակցական չէ, համաժողովրդական է ու իրենց վարչապետի թեկնածուն չի կարող լինել վարկաբեկված մարդ, ինչպես ավելի վաղ հայտարարել էր Իշխան Սաղաթելյանը․ «Այսօրվա հրապարակում գտնվող ընդդիմությունն ունի լրջագույն կադրային բազա և կարող ենք ցանկացած պաշտոնում ամնգամ երեք մարդ ներկայացնել։ Կան մարդիկ, ովքեր ապաքաղաքական են ու չեն մասնակցում այս ցույցերին, բայց նրանք պատրաստ են իրենց գիտելիքներն ու փորձը ծառայեցնել պետությանը»։
Մամուլում բավական ակտիվ շրջանառվում է ՀՀ նախկին ՄԻՊ Արման Թաթոյանի՝ վարչապետի թեկնածու առաջադրելու հարցը։ Այդ մասով Վանեցյանը նշեց, որ առաջարկը օդում կա և հիմա գնդակը Արման Թաթոյանի դաշտում է։
«Եթե պարոն Թաթոյանը ցանկություն ունի զբաղվել ակտիվ քաղաքականությամբ, թող գա այստեղ՝ հրապարակ և սկսի քաղաքական գործունեությունը կամ այլ տեղ սկսի։ Պարոն Թաթոյանը հասուն մարդ է, ինքը կորոշի՝ ուզում է զբաղվել քաղաքականությամբ, թե՞ ոչ։ Մենք որևէ մեկին չենք արգելում գալ հրապարակ։ Սա բոլորի հրապարակն է։ Ես դեմ չեմ ոչ իրեն տեսնել այստեղ, ոչ ուրի մեկին։ Բայց նաև ասեմ, որ այս հրապարակում կան մարդիկ, ովքեր ինձ համար անընդունելի են։ Ինձ համար այդ մարդկանց այստեղ գտնվելը հարված է Շարժմանը։ Բայց մենք չենք կարող ասել՝ գնացեք այստեղից։ Կան մարդիկ, որոնք խոսում են ընդդիմադիր դիրքերից ու նույնականացվում են մեզ հետ, բայց մենք այդ մտքերի հետ համաձայն չենք։ Դուք նայեք հարթակին, ովքեր են ելույթ ունենում։ Մենք որոշ չափով պատասխանատու ենք հարթակից ելույթ ունեցողների համար։ Հիմա, եթե ինչ-որ մեկը գա այստեղ վրան դնի ու պայքարի, ես չեմ կարող ասել՝ եղբայր գնա այստեղից։ Սա համազգային շարժում է»,-խոսքը եզրափակեց Արթուր Վանեցյանը։
