Այս պահին զոհված զինծառայողների ծնողները հավաքվել են Քննչական կոմիտեի դիմաց։ Նրանք պահանջում են ընթացք տալ իրենց միջնորդությանը։ Ծնողները նշեցին, որ իրենք պահանջում են 44-օրյա պատերազմի դեպքով հարուցված քրեական գործի շրջանակում հարցաքննվի Նիկոլ Փաշինյանը, ապա՝ կալանավորվի։
«Նախկիններին մեղադրել, իրեն արդարացնելու համար, չի լինելու, դա չի փրկելու իրեն։ Յուրաքանչյուր ղեկավար, ով նստում է աթոռին, կատարվածի համար ինքն է պատասխանատու։ Մենք արդար դատաքննություն ենք պահանջելու։ Ինչու իրենց երեխաները ուզում են ապրել, մեր երեխաները չէի՞ն ուզում ապրել։ Ով էր իրենց իրավունք տվել մեր տղաներին զրկել կյանքից ու հիմա մեզ արհամարհելով ապրել մեր տղաների արյան հաշվին։ Մենք չենք տվել այդ իրավունքը։ Աննա Հակոբյանը մեկ անգամ ասել է տղաները հանուն ոչնչի գնացին, ոչ, կասեմ, որ մեր տղաները հանուն իրենց նման ոչինչների գնացին, ոչ թե ոչնչի։ Մեր տղաները գաղափարի համար են գնացել, բայց եթե իրենց այդ արժենքներին ծանոթ չեն, չունեն, դա իրենց խնդիրն է։ Մեր տղաները գիտեին ինչի համար են զոհվում»,- ասացին ծնողները։
ՀՀ քննչական կոմիտեի պաշտոնյան, ով իջավ ծնողների հետ խոսելու, նշեց, որ այս պահին Արգիշտի Քյարամյանը տեղում չէ, իրենք լրացուցիչ կզանգահարեն ծնողներին, հանդիպում կկազմակերպեն։
