Հայաստանը 2021 թվականին ԵԱՏՄ բյուջեից ստացել է 84 մլրդ 840 մլն դրամ, ինչը 2020-ի նկատմամբ ավելացել է ավելի քան 16 մլրդ դրամով: «Արմենպրես»-ի փոխանցմամբ՝ այս մասին ասաց ՀՀ ֆինանսների նախարար Տիգրան Խաչատրյանն ԱԺ մշտական հանձնաժողովների համատեղ նիստում ՀՀ 2021 թ. պետական բյուջեի կատարման մասին տարեկան հաշվետվության քննարկմանը՝ անդրադառնալով ԵԱՏՄ-ի բլոկին:
«Մենք ունենք ընդհանուր բյուջե՝ հավաքագրվող մաքսատուրքեր, քանի որ միևնույն տնտեսական տարածքում ենք, և իրավաբանական անձանց կողմից վճարվող մաքսատուրքերը հավաքագրվում են ընդհանուր բյուջեում, որտեղից ստանում ենք մեր բաժինը, որը, ըստ 2019 թվականից գործող կարգավորումների, կազմում է 1.22 տոկոս: 2021 թվականի ընթացքում մենք ստացել ենք 84 մլրդ 840 մլն դրամ, որը 2020 թվականի 68 մլրդ 267.3 մլն դրամի նկատմամբ ավել է 16 մլրդ 572 մլն դրամով կամ 24.3 տոկոսով»,-ասաց Խաչատրյանը:
Նախարարը նշեց, որ հիմա կան որոշակի դժվարություններ՝ կապված վճարային համակարգերի և փոխադարձ հաշվարկների հարցում եղած անորոշությունների հետ: «Հուսով ենք, որ շուտով այդ հարցը կհանգուցալուծվի, և այն գումարները, որ պետք է փոխանցենք ԵԱՏՄ կառույցներին, կփոխանցենք՝ համապատասխանաբար ստանալով մեր բաժինը: Այսօր դեռևս այդ քննարկումները այս տարվան վերաբերող մասով ընթացքի մեջ են: Եվ վերջին փոխադարձ վճարումները մենք կատարել և ստացել ենք փետրվարի վերջի դրությամբ: Արդեն 3 ամսից ավել ժամանակահատված է, որ այդ վճարները կուտակվում են և դեռևս ոչ մեր կողմից են վճարվում և ոչ էլ համապատասխանաբար հետ են ստացվում»,-ասաց Խաչատրյանը:
