ՀԵԸ Անդրանիկ ֆութպոլի խումբը փայլուն արդիւնքներով աւարտեց Լիբանանի ֆութպոլի Դ. դասակարգի ախոյեանութեան զտման փուլի մրցումները եւ բարձրացաւ Գ. դասակարգ:
Դ. դասակարգի ախոյեանութեան մասնակցեցան Լիբանանի հինգ նահանգները ներկայացնող 96 խումբեր: Ախոյեանութիւնը ընթացաւ նահանգային դրութեամբ, ուր հինգ նահանգներու ընդհանուր դասաւորումներուն գլխաւոր երկու դիրքերը գրաւող կազմերը անցան երկրորդ փուլ (թիւով՝ տասը խումբ):
Երկրորդ փուլ անցնող տասը խումբերը երկու խմբակներու բաժնուելով, մրցեցան իրարու դէմ: ՀԵԸ Անդրանիկի տղաքը այս փուլին արձանագրեցին երկու յաղթանակ, մէկ հաւասարութիւն, կրելով մէկ պարտութիւն եւ բարձրացան Գ.դասակարգ:
Իրենց վերջին մրցումին, ՀԵԸ Անդրանիկի տղաքը՝ 0-0 արդիւնքով հաւասարութիւն մը արձանագրեցին Հուտայի դէմ: Այս արդիւնքը բաւարար էր որպէսզի ՀԵԸ Անդրանիկ ապահովէ Գ. դասակարգ բարձրանալու ուղեգիրը: Մրցումը տեղի ունեցաւ Շաբաթ, 7 Օգոստոս 2021-ին, Պհամտունի մէջ:
ՀԵԸ Անդրանիկի մարզիչն է Ղայսան Սայլամէ: Վարչական պատասխանատուները՝ Պէյրութի ֆետերասիոնի ՀԵԸ-ի ներկայացուցիչ՝ Վահէ Հաքիմեանը, Յակոբ Աքրապեան, Անդրանիկ Գոճաւաքեան, Կարօ Եալմանեան, Սեդրակ Արթին, Յովսէփ Մոսկոֆեան:
ՀԵԸ-ի համակիրներուն անունով կը շնորհաւորենք ՀԵԸ Անդրանիկի մարզիկները եւ վարչական պատասխանատուները:
