Օգոստոսի 14-ին առցանց տեղի ունեցավ Ամերիկայի Միացյալ Նահանգների Հայ առաքելական եկեղեցու Արևմտյան թեմի հայերենի ուսուցիչների ավանդական հավաքը, որին մասնակցեցին 70-ից ավելի ուսուցիչներ, տնօրեններ, հայագետներ։ Հոբելյանական 10-րդ ժողովը տարբերվում էր նախորդներից նրանով, որ ներկաները ոչ միայն Արևմտյան, այլև ԱՄՆ Արևելյան թեմից ու Ռուսաստանի Դաշնությունից էին։
Հավաքը բացվեց թեմակալ առաջնորդ, գերաշնորհ Տ․ Հովնան արք. Տերտերյանի օրհնության խոսքով և ընդհանրական աղոթքով։
Աշխատաժողովը կազմակերպել էին Արևմտյան թեմի շաբաթօրյա դպրոցների հոգևոր տեսչությունը և գիտակրթական հանձնախումբը։ Վերջինիս պատասխանատու դոկտոր Էլլի Անդրեասյանն ամփոփ ներկայացրեց շաբաթօրյա վարժարանների ձեռքբերումները, կրթական-մանկավարժական խնդիրները։ Հոգևոր տեսուչ, բարեշնորհ Հովհաննես սարկավագ Գումրույանը հակիրճ ներկայացրեց օրվա բանախոսներին, որոնք Հայաստանից էին միացել հավաքին։
«Հայաստանի ներկա լեզվավիճակը» թեմայով խոսեց ՀՀ Լեզվի կոմիտեի նախագահ, պրոֆեսոր Դավիթ Գյուրջինյանը։
«Հայկական կրթական միջավայր. ավանդույթ և հնարավորություններ» թեմայով խոսեց «Սփյուռք» գիտակրթական կենտրոնի տնօրեն, պրոֆեսոր Սուրեն Դանիելյանը։
Բանախոսություններն ամփոփվեցին հարց ու պատասխաններով և քննարկումներով։
Աշխատաժողովի ավարտին Հովնան սրբազանը գնահատանքի ջերմ խոսք ասաց բանախոսներին և մայրենի լեզվի մշակներին՝ առաջարկելով շարունակել համագործակցությունը այլ ձևաչափերով ևս։
ԱՄՆ Արևմտյան թեմի շաբաթօրյա վարժարանների մամլո դիվան
