Ամերիկյան Amazon ընկերությունը հայտարարել է, որ պատրաստ է վճարել իր շուրջ 750 հազար աշխատակիցների ուսման վճարը, ովքեր սովորում են քոլեջներում և համալսարաններում՝ բակալավրի աստիճան ստանալու համար: Ընդ որում, ընկերությունը վճարելու է ոչ միայն չորս տարի շարունակվող ուսման վարձը, այլև նրանց դասագրքերի, տրանսպորտի և այլ հավելյալ ծախսերը:
«Արմենպրես»-ի փոխանցմամբ, ընկերությունը մտադիր է այս ծրագրի համար մինչև 2025 թվականը ծախսել 1.2 մլրդ ԱՄՆ դոլար:
Ծրագրից կօգտվեն այն աշխատակիցները, ովքեր 90 օր կաշխատեն ընկերությունում: Ընդ որում, եթե ուսման ընթացքում կամ դրանից հետո նրանք հեռանան աշխատանքից, ստիպված չեն լինելու վերադարձնել ուսման վճարը:
Amazon-ի այն աշխատակիցները, ովքեր աշխատում են շաբաթական 20 ժամ, իրավունք կունենան ստանալ ուսման վարձի 50 տոկոսի չափով փոխհատուցում:
