Արցախի խորհրդարանը երեկ ձևակերպեց իր ընդհանուր դիրքորոշումը, սահմանեց այն կարմիր գծերը, որոնք պետք է լինեին բանակցությունների գործընթացի տրամաբանության ներո։
Այս մասին խորհրդարանական ճեպազրույցների ժամանակ ասաց «Պատիվ ունեմ» խմբակցության պատգամավոր Տիգրան Աբրահամյանը։
«Ես նույնիսկ զարմացա, որ կարողացան այս պայմաններում կոռեկտության սահմաներում ձևակերպել այն անընդունելի մոտեցումը, որն այսօր արտահայտում է ՀՀ իշխանությունը։ Քաղաքակիրթ լեզվով ու բառամթերքով արձագանքել այն խորհրդարանական մեծամասնությանը, խորհրդարանական գործիչներին, ովքեր Արցախի ապագան տեսնում են Ադրբեջանի կազմում, շատ մեծ տաղանդ ու ուժ է պետք առանց հայհոյանքի արձագանքելու»,- ասաց պատգամավորը։
Աբրահամյանի խոսքով՝ այսօր արցախցին, չնայած հիասթափություններին, մտահոգություններին, չնայած ստեղծված այս անմխիթար իրավիճակին, ամուր կպած է իր արմատներին։ Եվ ես այսօր արցախցու մոտ տեսնում եմ կամք՝ մինչև վերջ գնալու, և սրանց պատասխանը արցախցին դեռ տալու է։