Հայկական կողմը մինչև այս պահը չի արձանագրել, որ դե յուրե ՀՀ տարածքում գոյություն ունեն ադրբեջանական անկլավներ, հակառակը՝ Արծվաշենը դե յուրե ՀՀ տարածք է։ Այս մասին Ազգային ժողովում Կառավարության հետ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը, անդրադառնալով Բրյուսելում եռակողմ հանդիպումից հետո շահարկվող անկլավների հարցին։
«Այդ հարցը ծագեց այն ժամանակ, երբ հաղորդագրության մեջ ասվում էր «Ադրբեջանի և Ադրբեջանի միջև հաղորդակցություն ու Հայաստանի և Հայաստանի միջև հաղորդակցություն»: Եվ հարց էր ծագում, թե այս ինչ Հայաստանի և Հայաստանի միջև հաղորդակցություն է: ԱԽ քարտուղարը մեկնաբանել է, որ խոսքն, օրինակ, Երասխի և Մեղրիի միջև երկաթուղային հաղորդակցության մասին է, նաև կարող է դե յուրե ստեղծվել հաղորդակցություն ավտոմոբիլային հաղորդակցության համար: Իհարկե, ավտոմոբիլային ճանապարհ մենք ունենք Հայաստանի տարածքով Մեղրիից դեպի Հայաստանի բոլոր հատվածներ, բայց երկաթուղային ճանապարհը միայն դրա մասին է»,-ասաց Փաշինյանը:
Ինչ վերաբերում է անկլավներին՝ վարչապետը վստահեցրեց, որ այդպիսի հարց, որպես այդպիսին, չի քննարկվել Բրյուսելում: Սակայն նա ընդգծեց, որ Ադրբեջանն այդ հարցը ակնարկով կամ ուղիղ ձևով ամենատարբեր ձևաչափերում բարձրացնում է:
«Եվ մեր դիրքորոշումն էլ այդտեղ թափանցիկ է և հրապարակային: Մենք ասել ենք, որ այդ բոլոր պրոցեսներում պետք է խորամուխ լինենք իրավական հիմնավորումների մեջ: Եվ ասել ենք, որ մինչև այս պահը մեր ուսումնասիրություններով մենք չենք արձանագրել, որ դե յուրե ՀՀ տարածքում գոյություն ունեն ադրբեջանական անկլավներ, հակառակը՝ մենք արձանագրել ենք, որ Արծվաշենը դե յուրե Հայաստանի Հանրապետության տարածք է»,-ասաց Փաշինյանը:
Վարչապետը վստահեցրեց, որ որևէ մեկը չի կարող և չի պատրաստվում ժողովրդի թիկունքում, առավել ևս Արցախի ժողովրդի թիկունքում որևէ բան անել: Եթե իշխանությունը կունենա կոնկրետ առաջարկ՝ կոնկրետ լուծումների մասին, հանրությունը դրա մասին տեղեկացված կլինի պատշաճ ձևով: Նա առանց այն էլ դրամատիկ վիճակը քաղաքական նպատակներով կրկնակի, եռակի, հնգակի դրամատիզացնելը լավ պրակտիկա չհամարեց:
