Չի կարող լինել սահմանագծման և սահմանազատման աշխատանք, երբ Ադրբեջանը գտնվում է ՀՀ ինքնիշխան տարածքում: Այս մասին Ֆրանսիայի հրապարակում ասուլիսի ժամանակ հայտարարեց Իշխան Սաղաթելյանը։
«Չի կարելի խոսել Ղարաբաղի հայության իրավունքների, անվտանգության մասին՝ մոռանալով կարգավիճակի մասին։ Բոլոր հարցերը փոխկապակցված են։ Դա ընդամենը առիթ է երկիրը առանձին-առանձին հանձնելու համար»,- ասաց Սաղաթելյանը։
Նրա խոսքով՝ ՀՀ-ի և Ադրբեջանի միջև գործընթացները տեղի է ունենում Նիկոլ Փաշինյանի և Իլհամ Ալիևի պայմանավորվածությամբ, ոչ թե միջազգային հանրության պահանջով, ինչպես պնդում է Նիկոլ Փաշինյանը։
«Մենք երեկ այս ամբիոնից շատ հստակ հնչեցրել ենք այն նվազագույն կարմիր գծերը, որոնցով պետք է առաջնորդվի ցանկացած հայանպաստ և հայամետ իշխանություն։ Մեր պատկերացումները հստակ հնչեցրել ենք։ Դուք գիտեք, որ մենք ԱԺ արտահերթ նիստ ենք հրավիրել՝ առաջարկելով, որ այդ հայտարարության տեքստն ընդունվի խորհրդարանի կողմից։ Դրանով փակելով այն հարցը, որ իրենք ամեն անգամ երկիրը տանում են նոր դավադրության ու փորձում են հասարակությանը մոլորեցնել, թե իբր նման բան չկա։ ԱԺ արտահերթ նիստը վերջնական ջրբաժան է»- նշեց Իշխան Սաղաթելյանը։