Կարող եմ պնդել, որ Հայաստանում քաղաքական ճգնաժամ չկա և կարող եմ երկու փաստարկ կամ ապացույց բերել ասածներիս։ Անցած ամռանը տեղի է ունեցել արտահերթ խորհրդարանական ընտրություններ, որտեղ ՀՀ քաղաքացին հստակ պատասխաններ է տվել ու հանգուցալուծել են այն ժամանակ առկա քաղաքական ճգնաժամը։ Հարկ է նշել, որ այդ ընտրությունները ճանաչվել են ժողովրդավարական և թափանցիկ բոլոր միջազգային դիտորդների կողմից։ Այս մասին ՌԴ արտգործնախարար Սերգեյ Լավրովի հետ համատեղ ասուլիսի ժամանակ հայտարարեց ՀՀ ԱԳ նախարար Արարատ Միրզոյանը։
«Մենք հետևում ենք տեղի ունեցող միտինգներին։ Դրանց բազմամարդությունը կամ սակավամարդությունը չի խոսում այն մասին, րր այդ հանրահավաքները աջակցություն ունենն ՀՀ քաղաքացիների կողմից։ Միևնույն ժամանակ ուզում եմ նշել, որ ՀՀ-ն ժողովրդավարական երկիր է ու ցանկացած մարդ խաղաղ հավաքի իրավունք ունի։ Բայց եթե հեռանանք իրավունքի հարցից ու խոսենք գործընթացի տրամաբանական կողմի մասին, ես այդտեղ ողջախոհության հետ կապված հարցեր եմ տեսնում ինքս ինձ համար։ Նախ այդ ընդդիմադիր քաղաքական ուժերը հնարավորություն ունեն գործունեություն ծավալել խորհրդարանում և սուր քննադատության ենթարկել իշխանությանը։ Բայց նրանք ցավոք կամ բարեբախտաբար չեն օգտվում այդ իրավունքից»,- ասաց Արարատ Միրզոյանը։
ԱԳ նախարարը կարծիք հայտնեց, որ ընդդիմադիր ուժերը մի շարք առանցքային հարցերում, որում մեղադրում են ներկա իշխանությունների ոչ ճիշտ քաղաքականություն վարելու մեջ, չունեն կամ չեն ներկայացնում հակառակ դիրքորոշում։
«Հանրահավաքներ կազմակերպող ուժերը խոսում են այն մասին, որ Հայաստանի Հանրապետությունը ճիշտ քաղաքականույթուն չի վարում Լեռնային Ղարաբաղի հարցում, Ադրբեջանի հետ բանակցություններում, Հայաստան-Թուրքիա կարգավորման գործընթացում և այլն։ Պետք է ասեմ, որ տարօրինակ ձևով չենք տեսել հայտարարություն այն մասին, թե մեր կառավարության հրաժարականի դեպքում և իշխանությունը ինչ-որ կերպ նրանց փոխանցելու դեպքում, նրանք պատրաստվո՞ւմ են չեղարկել նոյեմբերի 9-ի եռակողմ հայտարարությունը, Սոչիի եռակողմ հայտարարությունը, պատրաստվու՞մ են դուրս գալ սահմանազատման գործընթացից, ապաշրջափակման գործընթացից։ Եթե այս հարցերի վերաբերյալ մոտեցում հրապարակվեր, գուցե տրամաբանական կլիներ, քանի որ մենք հրապարակում ենք մեր մոտեցումները։ Տրամաբանական կլիներ, որ այս առանցքային հարցերի շուրջ նրանք հակառակ դիրքորոշում ունենային։ Ինչքանով որ հասցրել եմ հետևել հանրահավաքներին, որևէ խոսք նշածս գործընթացները կասեցնելու մասին չի եղել, ինչը ինձ թույլ է տալիս ենթադրել, որ այդ քննարկվող թեմատիկան ընդդիմության կողմից շահարկման առիթ է»,-իր խոսքը եզրափակեց Արարատ Միրզոյանը։
