Մեր քննարկման առանցքում էր Հայաստանի և Ադրբեջանի հարաբերությունների կարգավորման հնարավոր փաստաթղթին և Լեռնային Ղարաբաղի հակամարտության կարգավորման գործընթացին վերաբերվող հարցեր։ Ես վերահաստատել եմ ՀՀ կառավարության պատրաստակամությունը տարածաշրջանում խաղաղության հասնելու ուղղությամբ։ Այս մասին ՌԴ արտգործնախարար Սերգեյ Լավրովի հետ համատեղ ասուլիսի ժամանակ հայտարարեց ՀՀ արտգործնախարար Արարատ Միրզոյանը։ Հիշեցնենք, որ ասուլիսից առաջ տեղի է ունեցել Միրզոյան-Լավրով առանձնազրույցը։
ՀՀ արտաքին գերատեսչության ղեկավարի խոսքով՝ ՌԴ-ն առանցքային դեր է ունեցել Ադրբեջանի կողմից Լեռնային Ղարաբաղի ժողովրդի դեմ սանձազերծած պատերազմի կանգնեցման գործում։ «Հայաստանը շարունակում է հավատալ, որ ՌԴ խաղաղապահ զորախումբը ի վիճակի է վերականգնել նոյեմբերի 9-ի ստատուս քվոն, որը խախտվել է ադրբեջանցիների կողմից Փառուխ գյուղ ներխուժմամբ»,- ասաց Միրզոյանը։
ԱԳ նախարարը շեշտեց պատերազմի հետևանքով գերության մեջ հայտնված հայ զինծառայողների և քաղաքացիական անձանց՝ հայրենիք վերադարձի հարցը։
«Պատերազմից 1,5 տարի անց էլ Ադրբեջանը, խախտելով միջազգային մարդասիրական օրենքները, հրաժարվում է վերադարձնել հայ ռազմագերիներին այլ քաղաքացիներին։ Հուսով ենք, որ Ռուսաստանը ավելի մեծ ջանքեր կգործադրի այս ուղղությամբ»,- նշեց Արարատ Միրզոյանը։
Միրզոյան-Լավրով առանձնազրույցի ժամանակ քննարկվել է նաև տարածաշրջանային տրանսպորտային ուղիների ապաշրջափակման հարցերը։ «Մենք գոհունակություն ենք հայտնել սահմանազատման և սահմանային անվտանգության հարցերով ստեղծված հանձնաժողովի առաջին հանդիպման աշխատանքներից և հույս հայտնել վերջինիս արդյունավետ գործունեության առնչությամբ։ Ակնկալում ենք որ ռուսական կողմը իր խորհրդատվական աջակցությունը կցուցաբերի այս աշխատանքներին։ Եվս մեկ անգամ ողջունում են նախարար Լավրովին Հայաստանում»,- ընդգծեց ՀՀ ԱԳ նախարարը։
Ի թիվս այլ հարցերի, Արարատ Միրզոյանը Լավրովի հետ առանձնազրույցում կարևորել է նաև Ադրբեջանի կողմից հայկական մշակութային և կրոնական ժառանգության վանդալիզմի ենթարկման հարցը։