Շարժումը երբևէ և որևէ պարագայում չի կարող մարել, որովհետև Շարժման մարումը կամ կասեցումը ժողովրդի պարտությունն է։ Այս մասին Ֆրանսիայի հրապարակում լրագրողների հետ զրույցում ասաց «Դիմադրություն» շարժման համակարգող, ԱԺ փոխխոսնակ Իշխան Սաղաթելյանը՝ պատասխանելով լրագրողի այն հարցին, որ հանրահավաքները օրեցօր սակավամարդ են դառնում, արդյոք դա նշանակում է, որ Շարժումը մարում է։
«Շարժումը Հայաստանի նորանկախ պատմության մեջ բացառիկ գործընթաց է, որը վստահաբար շարունակվելու է։ Շուրջ 40 օր 24 -ժամյա ռեժիմով մարդիկ դուրս են եկել փողոց։ Ունեցել ենք և՛ 40-50 հազարանոց հանրահավաքներ, երթեր, ունեցել ենք նաև նվազումներ։ Բայց այսօր էլ փաստվեց, որ Շարժումը չի կարող մարել։ Շարժումը բացառապես հայկական ու համաժողովրդական է՝ առանց որևէ երկրի կամ Հայաաստանի որևէ քաղաքական ուժի աջակցության։ Այն մաքուր ազգային Շարժում է, որն իր նպատակին հասնելու է։ Այն, որ ամբողջ աշխարհն արդեն գիտի, որ հայ ժողովուրդը այս պարտության հետ չի համակերպվելու, պատրաստ չէ նոր զիջումների, դա փաստ է։ Նահանջ, հետքայլ չի լինելու, կարող եմ վստահեցնել ձեզ։ Մեր բոլոր քննարկումները Շարժումն ավելի ակտիվացնելու, թերությունները շտկելու մասին են»,-ներկայացրեց Իշխան Սաղաթելյանը։
Նրա նշեց, որ մարտավարական առումով փոփոխություններ սպասվելու են Շարժման գործողություններում։ «Այն, ինչ մինչ այսօր արել ենք, եղել է արդյունավետ, բայց նաև ունենք նոր մարտավարության խնդիր։ Հնարավոր է քայլերի մեջ լինեն մարտավարական փոփոխություններ։ Մենք այս 40 օրվա ընթացքում ինչ անհրաժեշտ եղել է արել ենք, բայց այո, նոր մոտեցումների խնդիր կա։ Ակտիվ քննարկումների մեջ ենք։ Որոշ քայլեր և գործողություններ փոփոխության ենթարկելու ենք»,- ընդգծեց նա։
Լրագրողի հարցին՝ շատերը քննադատում են Շարժմանը վճռական չլինելու մեջ, Սաղաթելյանն ասաց՝ վճառականություն ասելով ի՞նչ նկատի ունեն, արկածախնդրությու՞ն։
«Շատ հեշտ է նստել համակարգիչների առաջ ու մեղադրանքներ հնչեցնել։ Մենք վճռականության պակաս չենք ունեցել։ Եթե պետք է եղել պատը ճեղքել, որովհետև մեր առջև դրված է եղել նպատակ, ճեղքել ենք, փակ ճանապարհ է եղել բացել ենք, բայց գնալ արկածախնդրության և Շարժումը տապալել, չենք արել ու չենք անելու։ Նիկոլին պետք է հեռացնել առանց արյուն, ինչքան արյուն թափվել է, հերիք է, ինքը արյան կարոտ է։ 40 օր տասնյակ հազարավոր մարդիկ եղել են փողոցում։ Այդ օրերի ընթացքում մենք իշխանությանը որևէ ժամանակ լեգիտիմ իրավունք չենք տվել ուժ կիրառելու։ Բայց այսօր 2500 հոգի բերման է ենթարկվել, 48 հոգի ձերբաակալվել, 31-ը կալանքի տակ են։ Կան բազմաթիվ հարուցված քրեական գործեր, օրական հարցաքննության են կանչվում մի քանի տասնյակ քաղաքացիներ։ Եթե վճռական չլինեինք, իմ ընկերներից 31 հոգի կալանքի տակ չէր լինի։ Մենք արկածախնդրության չեն գնալու, որովհետև դա Շարժմանը ոչինչ չի տալու։ Իսկ ովքեր ոգևորված այդ մասին ասում են, հաջորդ օրը մեղադրելու են մեզ»,- հայտարարեց Սաղաթելյանը։
