2020թ-ի նոյեմբերից հետո Արցախում իրականացվել է 136 մլրդ դրամի ծրագիր։ Դրանից 120 մլրդ-ը` 2021թ-ի ընթացքում: Այս մասին այսօր ԱԺ-ում 2021թ. պետական բյուջեի կատարման մասին տարեկան հաշվետվության նախնական քննարկմանը հայտնեց ՀՀ վարչապետ Նիկոլ Փաշինյանը, գրում է Sputnik Արմենիա լրատվականը։
«Օրինակ Արցախի բնակչության կոմունալ ծախսերի վճարում. 2021թ-ին Արցախի բնակչության ողջ կոմունալ ծախսերը հոսանք, ջուր, գազ, նաև կապի ծառայություններ, վճարվել են ՀՀ կառավարության կողմից։ Արցախի պետական հատվածի ամբողջ աշխատավարձը վճարվել է ՀՀ կառավարության միջոցներովպատգամավորներից սկսած, ուսուցիչներով վերջացրած, բոլորի աշխատավարձերը վճարվել են ՀՀ կառավարության կողմից։ Արցախի առողջապահության ծախսերը վճարել է ՀՀ կառավարությունը ՀՀ ժողովրդի վճարած հարկերից»,- ասաց Փաշինյանը։
Նա նաև նշեց, որ գույքային վնաս կրած արցախցիներին տրվել է գումարային փոխհատուցում։ 108․000 մարդ ամիսներ շարունակ ստացել է 68 000 դրամի աջակցություն։ Փաշինյանը համեմատության համար հիշեցրեց, որ Արցախի ամենաբարձր բյուջեն 2019թ-ին եղել է 117.9 մլրդ դրամ, որից 57.8 մլրդ-ը վճարվել է ՀՀ բյուջեից։ 2021-ին Արցախի բյուջեի եկամուտները եղել են 174 մլրդ դրամ, որից 128 մլրդ-ը վճարել է Հայաստանը։
«Արցախը երբեք ավելի մեծ բյուջե չի ունեցել, և ՀՀ-ը Արցախին երբեք ավելի մեծ ծավալով աջակցություն չի ցուցաբերել»,- ասաց Փաշինյանը։
Արդյունքում, ըստ Փաշինյանի, Արցախում 2022թ-ին 20 տոկոսով աճել են կենսաթոշակներն ու նպաստները։
ՀՀ պետական ծրագրերն Արցախում այս տարի ևս շարունակվում են։ 2022թ-ին ՀՀ բյուջեով Արցախին տրամադրելու համար նախատեսված գումարը 144 մլրդ դրամ է։ Դրանից բացի, Արցախում բնակարանաշինության համար այս տարի հատկացվելու է նաև լրացուցիչ 30 մլրդ դրամ։
